Upacara Bayi Tiga Bulanan Pemargin Upakara Nigang Sasihin

 helaibuku.blogspot.com/ Om Swastyastu, Sahabat sedharma Helai Buku, di bawah ini Helai Buku postingkan tentang tata cara pelaksanaan Upacara bayi tiga bulanan atau Pemargin upakara nigang sasihin. Dalam hal ini Desa mawecara memegang peranan karena di tiap daerah tentu pelaksanaannya agak berbeda-beda, tetapi alangkah baiknya kita perlu mengetahui perbedaan itu untuk menambah wawasan kita tentang keragaman adat budaya Hindu di Bali. Baiklah, selamat membaca!

A.    Ngaturang Uninga

1.      Pangawit sang muput karya ngaturang uninga dumun ring Ida Batara Kamulan atawa Ring Sanghyang Tiga Sakti ring, Sanggar Pamujan.

Tatujone, Ida Batara miwah leluhur-leluhure, mangda uning ring indik pamargin upakara-upakarane sane kalaksanayang ring rainane mangkin.

Banten piuninge, luire: Canang-wangi atawa Canang-sari tigang tanding, saha pangluar akidik, sodaan nasi putih-kuning atanding miwah tetabuh arak, berem, sajeng, toya kalih dupa. Malih sangku atawa panirtayan sane sampun madaging toya-ening, manut akeh tirtane sane kabuatang, upami: tirta bajang-colong, tirta-pabersihan, tirta-sambutan miwah tirtan banten. Puniki sampun unggahang ring pasimpangane sane wenten ring Sanggah.

Puput ngunggahang banten miwah panirtayane punika, sang muput-karya raris ngayabang banten pangluar ring pamrajan, marep ring para-kanca iringan Ida Batara.

a.       Mantra/Saa Pengluar : “Om, parakancan Ida Batara Samodaya, ndaweg taiki manusanira angaturi, iki tadah sajinira, pukulun sinungaken dwaramanawi ta kirang – luput aturan iki, ndaweg sampurakna nghulun. Om Sri ya we namu namah swaha”.

b.      Dados taler nganggen saa sapuniki :

“Pukulun genganen Batara Siwa, Brahma, Wisnu, angluwarana sakwehing Sang Kala ni Sanghyang Dewa, rikang angga sakti, sarwa kala, sampurna ya namah swaha.”

Usan punika, raris kecer-kecerang (turuhang) punika tetabuhane, upami : arak, brem, sajeng miwah toyane ring samping pasegehane:

2.      Sane mangkin wau ayabang bantene sane katur ring Ida Batara Kamulan.

a.      Mantra/saa :

“AUM Dewa-Dewa Tri Dewanam,
Tri-Murti Tri Lingganam,                            
Tri-Puruso suda nityam,
Sarwa Jagat Jiwatmanam.”
“AUM Guru – Dewa Guru-Rupam,
Guru – Madyam Guru – Purwam,
Guru - Pantaram Dewam,
Guru – Dewa suda nityam.”
“AUM Brahma Wisnu Iswara Dewam,
Jiwatmanam Tri Lokanam,
Sarwa Jagat Pratistanam,
Suda klesa winasanam.”

b.      Dados taler nganggen saa sapuniki :

“Inggih Ratu Batara Tiga-Sakti, puniki titian ngaturang uninga, doaning ring rainane mangkin titian ngawentenang upakara Nigang-Sasihin. Inggih, cendek titian. Nunas mangda ledang Paduka Batara nglugrahin krahajengan titian sareng sami.

3.      Nunas Tirta, Mantra Sapta Tirta :

a.      “AUM Gangga, Saraswati, Sindu, Wipasa, Kausiki, Nadi, Yamuna, mahati srestah, Sarayus ca Mahanadi”.

b.      Dados taler-nganggen saa:

“Inggih Ratu Batara, dimadak ledang susuunan titian nglugrahin wasuh-pada, inggih titiang mamitang pisan, mangda titian, sareng sami mamanggih rahayu.

4.      Ngayabang banten ring Sanggar Pamujan :

“Inggih Ratu Batara, sakadi mangkin Paduka Batara katuran anahuran amuktia aturan titian puniki. Enak paduka Batara makaramean, amuktia sarining aturan titian. Dumadak singgih Paduka Batara sami, ledang nyuryanin titian sareng sami”.

5.      Mabakti :

“Ndaweg titiang nunas sinampura, sakadi mangkin titian ngaturang sembah saking manah titian suci-nirmala jati ; inggih, dumadak singgih Paduka Batara, ledang nglugrahin krahajengan titian sareng sami.”

6.      Nglungsur banten miwah toya-tirta :

“Inggih Pukulun Paduka Batara, munggwing aturan titian sampun kengin Paduka Batara nyari, inggih sane mangkin titian nglungsur mangda titian sareng sami rahajeng.”

B.     Segehan nasi-putih atanding maulam bawang-jahe.

Segehane puniki katur ring Sang Kala atawa Sang Buta, ring genahe sane tetiga punika, upami :

1.      Ring Ulu, sesontengipun :

“Ndah ta kita Sang Kala Bucari, iki tadah sajinira, aja ta ameda-meda”.

2.      Ring Lebuh, sesontengipun :

“Ndah ta kita Sang Durga-Bucari, iki tadah sajinira, aja ta ameda-meda:”

3.      Ring Natahe sesonteng ipun:

“Ndah ta kita Sang Buta Bucari, ikitadah sajinira, aja ta ameda-meda:”

Pade sampun puput pailene ngaturang pasegehan-pasegehan punika, sane mangkin kalanturang antuk nglaksanayang banten Pabyahkaonane miwah banten Bajang Colong, Banten punika wantah angiu, tegep madaging buki (payuk bolong), kekeb-penyakanan makalung duk jaka, makamben tapis-kelapa, saha madaging tetorek tampak dara antuk pamore base, miwah banten-banten : seetan kalih soroh, buki, jangan-ampin, sanga-urip, kampuh-agung, jrimpen dedari kekalih putih-kuning, daksina kekalih, tegteg kekalih, teenan, sagi-sagi, canang, miwah canang-panyapa.

Prantos-prantose sane sampun sadya irika upami: Reregek, Papah, Pusuh, Ayam-colong miwah sane seos-seosan.

C.     Pangawit, margiang dumun tirta-panglukatane, Mantra:pukulun sredah Batara Siwa Murti Sakti, anibakaken Tirta-kamandalu, winadahan kundi-manik, makasuklaning buana alit, makasuklaning buana –agung, makauriping buana alit, makauriping buana-agung amuburana sarwa ujar ala, ipen ala, tujuh teluh, tranjana, kalukat, kalebur dening tirtan Batara Siwa Murti Sakti, siniratan mencar-mencur, angilangaken dasa-mala, papa-klesa, trimalaning janma manusa kabeh, moksa, ilang, kalukat dening tirtanira Batara Siwa Murti Sakti, wastu sidi namah swaha.”

D.    Mangkin sang-muput karya, patut nuhur Ida Batara Surya (Siwaraditya), Sanghyang Ibu retiwi miwah Dewa Gede Kemulan. Bantene sane ayabang mangkin, punika banten seetane asibak. Saa-saa: “Inggih Pukulun mangkin manusanira Paduka Batara aneda angaturi Paduka Batara Siwa Raditya, Batari Pertiwi muah Dewa Gede Kemulan, tumurun ka Mercapada, malejeg amoring kukusing menyan, majagau, candana mrik, tumulia tedun Paduka Batara ring palemahing, ngulun, inuring Dewaning-Dewa muah kaprenah kasanak, kaputu muah Widyadara-Widyadari samua Om Paramasanti ya namah swaha.”

E.     Ngelis Banten.Matepung Tawar, saa :

“AUM, Batara Guru atepung-tawar, sarwa Dewa angilangaken sebel-kandel, geleh-latek kabeh. Om ya namah swaha.”

“AUM Sang Janur-pita mangadeg, tumurun Batara Siwa ka Mercepada, kinabaktian dening janma manusa kabeh. Om Nir-roga, nir-upadrawa. Om Kreta sudamam suda.

Usan nguncarang saa-saane puniki, tumuli soratang tirtane ring banten-bantene sane wenten ring ajeng dane sang muput karya. Asapunika taler beras tepung-taware, sambehang kabantene.

F.      Risampune puput pailene ngelis banten miwah matepung-tawar, mangkin ayabang banten bhaykaone punika.

Byahkaon Mantra/saa-saa:

“Pukulun sang Kala-kali, puniki pabyahkalan si jabang bayi, katureng Sang Kala-kali, sira ta reke pukulun angluwarana sakwehing Kala, Kala Carik, Kala Kapati, Kala Kalaran, Kala Karogan, Kala Ujar, Kala Pengpengan, Kala Gring, Kala Sepahan, Kala Kacangking, Kala Brahma, Kala Ngumik, kala Durbala-Durbali, maka sakwehing kala wigna kang aneng awak sarirane si jabang-bayi, kalwarana denira batara siwa makadi batara-batari sami rumuat si jabang bayo wruhanipun hyang-hyange awakipun, kajenengana denira Sang Hyang Tri Purusa, kasaksenana denira Sang Hyang Trayodasasaki, lah sama ngruat Sang Kala-Kali, mundura, duluri ayur ipun si jabang-bayi, den anutug aken tuuh ipun tunggunen denira Sang Hyang Bayu Pramana.”

Usan nguncarang saa punika, sane mangkin ayabang banteng Bajang-colonge, upami : jrimpen dedari, kampuh agung, sanga-urip, tegteg daksina miwah sane lian-lianan.

Bajang-colong, mantra/saa:

“AUM, Sang Kosika, Sang Garga, Sang Metri, Sang Kursya, Sang Patanjala; Himalimpa-Himalimpi, pinaka Bapa Bajang, Babu Bajang, Bajang Papah, Bajang Tukad, Bajang Kamumu, Bajang Yuyu, Bajang Sampi, Bajang Kebo, Bajang kurkuta, Bajang Mungsi, Bajang Simbah, Bajang Lenga, sakwehningaraning Bajang, mulih kita maring deanta, Om Syah, Syah, Syah.”

G.    Usan pailene punika, sane mangkin sang muput karya raris nglukat prantos-prantose sane wenten irika, antuk toya panglukatan, tirta saking kamulan, tirta saking Ida Batara sami, miwah sane seos-seosan, saha nganggen prantos sibuh-pepek sane makatik antuk carang dadap tis, soksokan miwah ilih, sami sarwa sane kedas.

Prantos-prantose sane kalukat, luire:

1.      Kelapane sane magenah ring soksokane, madaging jina bolong satakan mabenang sedtu. Punika kaanggeh lambing “talin-banah” sane patut kabakta antuk ajin (gurun) rarene sane katigang-sasihin.

2.      Pusuh-pisange, sane kasnagkil anting biang-rarene, punika pinaka. Lambing pepusuh, linggan Sang Banaspati-raja. Pusuhe puniki yan pade madue, patut eteh-etehin antuk gelang, anting-anting, miwah sane seos-seosan. Nangin yan pade tan madue, dados taler tan kaeteh-etehin.

3.      Papah kelapa sane tuh, madaging gambar tatorekan jadma-jadmaan sane katorek antuk pamor sedah. Punika kaanggeh “Bajang-papah” pinaka linggan Sang Anggapati. Prantose puniki kagamel ulih anak alit.

4.      Reregek, ulat-ulatan papah kelapa, marupa jadma-jadmaan, punika kaanggeh “Bajang-Reregek” pinaka linggan Sang Banaspati. Prantose puniki kagamel ulih anak alit.

5.      Ayam, lua-muaninipun, manut ring lanang-iatrin rarene sane ka-tigang-sasihin. Yan lanang rerena ayam muani anggen colong, yang pade istri rarene, ayam lua anggen colong. Ayam-colonge puniki kaanggeh “Bajang-Colong”, sane kagamel antuk anake alit, pinaka linggan Sang Prajapati.

6.      Rarene sane katigang-sasihin, kaemban ulih anak istri.

7.      Prantos-prantose sane lian-lianan, upami: semprong sane madaging satsat, rerontek miwah sane seos-seosan, punika kagamel ulih anake alit-alit.

Prantos-prantose puniki, samian lukat antuk toya-panglukatan. Usan punika, raris sirat-siratin malih antuk toya pangening-ening.

H.    Risampune puput ngamargiang panglukatan miwah pangening –ening, raris sametone miwah alit-alite sane ngamel prantos-prantose punika, upami: kelapa; pusuh, papah, reregek, colong miwah sane lian-lianan punika, kenginan malinder ngider-kiwa, ngilehin kalangan genah bantene ring beten.

Sane pinih dumuna mamargi, gurun/ajin rarene, biange, miwah karuntutin antuk alit-alite sane ngamel prantos-prantose punika, miwah sane ngemban rarene.

Indik pidabdabe maileh, yan sampun ailehan, napak ring genah lesunge, sane sampun kasediayang irika-rauhing batu, patut sane pinaka ulu punika, ngletok-ngletokang batune ring lesu-nge punika. Kala punika sang muput karya, nguncarang saa atawa mantra, kadi asapuniki :

“AUM, wau pada sawau, anakira Ki-Tunggul Landung, putunira Ki Karang-Jagat, sira anak-anakan baligo, ingsun anak-anakan Antiga, Ingsun anak-anakan Watu”.

Pangaptinne, asapuniki. Rarene atawa okane sane kakaryanang upakara, mangd jati-jati kakuhuanipun sakadi anak anakan batu, kuat tur kukuh sapanjang yusa.

Paiderane puniki, kamargiang ping tiga.

I.       Puput ilen-ilene ring ajeng, raris lanturang antuk upacara: mateenan, matetebus miwah masesarik.

Teenan, mantra/saa:

“Pukulun tapakan teen, jinah satak-pelekutus lawe satukel, galihan, katihan, denira Cokor Batara anureksa, buat atur manusanira, awing-awang tutug, teka ring akasa, tutug ta jahan ring pertiwi. Pukulun Batara Siwa, suda akasa, suda bumi, suda mala, suda letuh sudamam swaha.”

Tetebus, mantra/saa:

“AUM, purna Surya, purna Candra, purna Bayu, den langgenganira, atep ring raga walunanira, anganaken pala-boga, angti-anti sabda rahayu, amandungan ratna kancana, Om Hram, Hrim, Sah Paramasi ya namah swaha. “

Sesarik, mantra/saa:

“Pukulan Batara Guru, manira aneda sesarik, asesarik ring kiwa, angiwakna pati, asesarik ring pungkur, angundurakna satru musuh, asesarik ring tengen, anadah I sri-sedana, asesarik ring arep, angarepaken bagya pasesangin, asesarik ring watuk, den kadi kukuhanira Sanghyang Siwa Raditya, Sagara-Ukir, aneda pageh kukuhanira sang sinayutan."

J.      Mangkin kalanturang antuk upacara Makekenyepan.

Rarene miwah prantos-prantose punika wedakin (borehin), lolohin (tambain)! Miwah ajeng-ajengin. Pamargine puniki dados inda-indayang atawa kenyep-kenyepin kewanten. Puput pailene puniki mangkin rarisang ngayab. Mantra/saa: “AUM, Pukulun Paduka Batara, pukulun sang sinayutan amilaku aneda akekenyepan, PukulunBatara asung lugraha maring awak sariranya, wedak-suci, anyuciaken sebel kandeling awak sariranya, tamba-sakti, angilangaken lara-roganya, muang pangan mapapangupajiwanya, Om, dirge ayur tat astu, astu, sidi.”

2. Rarisang mangkin ngedeng peras,

Mantra/Saa:

“AUM Pancaware bawet Brahma, Wisnu Saptawarewa ca, Sadwaresware dewasca, astaware Siwojnyeyah, Omkara muktya sarwa pras pranayanam.”

K.    Puput pailene punika, sane mangkin wau nyiramang rare. Prantos-prantose iriki, sampun cumawis wenten pane, sane sampun madaging toya miwah sekar, rarekayan yuyu-0yuyuan, udang-udangan miwah sarwa gumatat-gumitite sane seos-seosan. Sajaba punika, panene punika patut taler kaortain atawa ka gambarin, gambar “sikep Dewa Panawasangaan”, manut genahnya soang-soang upami : sanjata Bajra, duen Ida Sang hyang Iswara, magenah ring tepi kangin (purwa), sanjata Dupa, duen Ida Sanghyang Maheswara, magenah ring tepi kaja-kangin (Agneya) sanjata Danda, duen Ida Sanghyang Brahma, magenah ring tepi kaja (Daksina), sanjata Moksala, duen Ida Sanghyang Rudra. Magenah ring tepi kaja-kauh (Nairiti), sanjata Nagapasa, duen Ida Sanghyang Mahadewa, magenah ring tepi kauh (pacima), sanjata Angkusa, duen Ida Sanghyang Sangkara, magenah ring tepi kelod kauh (Bayabya), sanjata Cakra, duen Ida Batara Wisnu, magenah ring tepi kelod (Utara), sanjata Trisula, duen Ida Sang Hyang Sambu, magenah ring tepi kelod kangin (Aisanya; misah sane irng tengah-tengah (madya), sanjata Padma, duen Ida Sanghyang Siwa.

Tiyane punika, pinaka toya suci saking sapta-nadi (tukade sane pepitu), sane membah irika ring jagat Hindu (India). Punika awanan ring toyane Punika, kadagingin ulam-ulaman miwah sane seos-seosan. Pangawit prantos-prantose, upami: reregek, papahe, ayame punika dumunang sugi-suginin antuk toyane sane wenten ring panenen. Usan punika wau gurun (ajin) rarene miwah biange, masuci-muka irika. Puput punika wau pusuhe siramang irika ring panene, saha pa-payasan pusuhe, upami: gelang, kalung, miwah sane lian-lianan, punika samian. Ambil genahang ring panene. Usan punika wau rarene siramang ring panene.

Pepayasane punika, malih jebos gogo-gogo ring panene, sinambi rangsukang ring ragan rarene. Punika awanannya pailene puniki kawastanin taler “magogo-gogoan.” Rikala manghyasin rarene sang muput karya, patut nguncarang mantra atawa/saa, sapuniki: “AU, Hram, Hrim, sah Parama SIwa Aditya ya namah. Ulun amwitakna Si Jabang-bayi, anganggo ratna kancana, apan uwus tutug lekanipun, duluran ayu wredi.”

Iriki kaja-kelode meteges :

Ka-teben miwah ke luar Kaja = ka ulu (kauluan)

Kelod – ka teben

1.      Mabaang-Colongan :

Usan ilen-ilene nyiramang rarene, raris ayam-colonge punika celepang ring jalik – jalikane Ping tiga, Jalik-jalikane punika malakar antuk bata atawa kitakan tigang-siki. Pangaptinnya puniki, sumangdenya sang ngraganin rarene dahat pageh tur tekek ring anggan rarene. Sajaba punika, raris batis rarene enceg-encegang tanah ping tiga, ring samping jalikane. Pengaptinnya, ngaturang uninga ring Sanghyang Ibu Pertiwi, sumangdennya rarene terus kaemban, tur kaicen pangupajiwa sepanjang yusa.

 

Puput pailene punika, wenten taler sametone, sane ngamargiang upakara, asapuniki : ngicen tedan colong. Asapuniki pamarginipun : I pangemban rare punika ngicen ayame teda, kagenahang ring tangan kenawanne I pangemban. Raris tangane punika sane madaging tetedan ayam, kagenahang ring duhur sirah rarene, tumuli ayam-colonge punika cotot-cototang ring liman pangembane sane wenten ring duur rarene. Pangaptinne, mala-malan rarene punika mangda ical, kagingsirang atawa kakeberang ulih ayam cologne punika. Cendek ipun, mala-malan, sebel-kandel rarene ring niskala punika mangda ka-colong atawa ka-paling antuk I ayam punika. Punika ke awanannya, ayame punika kawastanin”colong”; colong mateges paling atawa pandung.

L.     Puput pula-paline mabiahkaon. Sane mangkin banten biahkaone punika miwah prantos-prantose punika, luarang ring pinggir margine atawa ring [inggir genah pasiraman desane, ring tukade, ring telabahe, atawa ring pancorane. Sakewanten,, sadurung ngamargiang pangluare punika, eteh-eteh atawa panganggen prantos-prantose punika, upami : wastran reregeke, papahe, miwah sane lian-lianan, mangda kagentosin antuk wastra sane kaonan. Doaning pacing makurtang. Ngluarang punika, tan wenang sakodo-kodona, upmai jag entungang ring tengah margine , atawa entungang ring genahe masiram. Becikne patut prantos-prantose punika, seleleg-selelegang ngenagang ring tepin margane atawa ring tepin genahe masiram ring pasiraman desane.

M.   Sane mangkin, rarene, biange kalih gurun (ajin) rarene, patut meseh, doaning pacing ngamargiang upacara “Natab”. Kala puniki sang muput karya, patut nureksain banten-bantene sane wenten ring baleen. Risampune puput meseh, raris rarene, biange miwah gurun (ajin) rarene melinggih ring dedampare atawa kursine, ngarepin banten ring baleen. Gurun atawa ajin rarene, malinggih ring kenawna, biange malinggih ring kee, rarene dados abin. Ring baleen punika, sampun wenten banten-banten upami : Pangulapan, Pangambean, Jejanganan-agung, Pula Gembal, Sekar-setaman, Pangiring, Sambutan, Sesayut, Penyeneng, Pangideng-ideng, Peras.  Sodaan atawa Punjung miwah Penek , teenan, Guru-renan miwah banten Kumara-kumari. Banten-banten puniki wenang kayabang antuk dane sang muput karya.

Pakeling: sadurung ngayabang banten, sang muput karya patut ngenjit-ngenjitin dupa miwah pasepan sane sampun wenten irika. Pangaptine, asapuniki. Geni-genine sane wenten ring dupane, punika pinaka Sanghyang Ageni, sane nyaksinin pamargin upakara-upacarane sane kamargiang mangkin.

Sapunika taler pasepane sane malepuk andusnyane sane harum punika satmaka ngundang Ida-Ida Batara minakadi : Sanghyang Siwa, Sada Siwa, miwah Sanghyang Parama Siwa, sumangdennya ledang tumedun saking Siwaloka, kairing antuk pada Dewa-Dewi miwah Widyadara-Widyadarine.

1.      Pengawit sane patut margiang dumun, punika tirta-tirtane, sirat-siratang ring rarene, biangne miwah gurun (ajin( rarene, saha kadulurin antuk mantra/saa : “AUM, Um rah pat asta ya nama swaha. Om, Swanam sampurna ya nama swaha. Om, Sri Pasupatiye Um Pat.”

2.      Teenan, mantra/saa:

“AUM Sanghyang SIwa Caturmuka, Pancamuka dewa byuha, sira Ing, Nang, Mang, Sing, Wang, Yang. Ang, Ung, Mang, namah.”

3.      Tetebus, mantra/saa:

“AUM, purna Surya, purna Candra, purna Bayu, den langgenganira, atep ring raga wulananira, anganaken pala-boga, anganti-anti sabda rahayu, amandungan ratna-kancana, Om Hram, Hrim, Sah Paramasiwa ya namah swaha.”

4.      Sesarik, mantra/saa :

“Pukulun Batara Guru, manira aneda sesrik, asesarik ring kiwa, angiwakna pati, asesarik ring pungkur, angunduraken satru-musuh, asesarik ring tengen, anadah I srisedana, asesarik ring arep, angarepaken bagya pasesangin, asesarik ring watuk, den kadi kukuhanira Sanghyang Siwa Raditya, Sagara Ukir, aneda pageh kukuhanira sang sinayutan.”

Puput pailene puniki, wau banten-bantene ring baleen punika ayabang. Banten-bantene sane patut ayabang, minakadi :

1.      Pangulapan, mantra/saa :

“Pukulun Kaki Pangawan, Nini Pangawan, Kaki Panjeneng, Nini Panjeneng, Nini Panjeneng, Kaki Samantra, Nini Samantara. Sampun sinamantaraken maring : Purwa, Daksina, Pascima, Utara, Madya, ndaweg reke pukulun sinalahaken baya pakeweipun, saking pamlagbagan-agung, pamacekan-agung, ulihakna jiwitanipun sang ingulapi ambe, ingantukaken paramanaipun, tan kaginggang, tan kagingsir, yowana awet aurip. Om Sidir astu ya nama swaha.”

2.      Pangambean, mantra/saa;

“AUM, Sira Sanghyang Sapta-patala, Sira Sang Sapta Dewata, Sira Sanghyang Besawarna, Sira Sanghyang Trinadi, Pancakosika, SIra Sanghyang Pramana, makadi sanghyang Urip, sira mageha ri stananira soang-soang, pakenaning ulun angawruhi sira, aneda raksanen ri sira, aneda urip warasa, dirgayusa, paripurna sira sang inambe. Om, Sidir astu ya nama swaha.”

3.      Jejanganan (Agung), mantra/saa :

“Pukulun Kaki Among, Nini Among, Bapa Bangklong, Babu Bangklong, Babu Abra, Babu Sinang, Babu Maranak, Babu Anjureni, Babu Anungkurat, Babu Wisesa, Babu Dedukun-abumi, Babu Gedebyah, Babu Surastri muah Babu Suparni.

Ingsun aneda sih kretanira, aneda jejanganan Si Jabang-Bayi, iki tadah sajinira, liwet kacang satungkeban lawan jangan sanyiru. Manawi ta hana kirang muah luput, sampun tan agung anyampura, iki piak satak, atetumbase sira maring ring pasar-agung, amilihana kabelanira soang-soang, sami sira amukti sari lawan sanakira kabeh. Apan alit kang sun aturaken, agung kang sun teda, aneda angluwarana sakwehing Bajang, Lara-roga, sangut-sangka, danda-upadrawaninipun, balikan mongen den abecik kang adrewe caru iki, sampun sira anyetut, sampun sira anggetes, balikan sira mongana den abecik, sungana enak-anak amangan, enak-aturu, enak ameng-ameng, katakana jajaka udar-udar, sampun denira sami asung nugraha rahayu, sampun sira amukti sari, sami sira mantuk angelingana kahyanganira soang-soang, angrenana urip-waras dirgayusa, paripurna, keduk timbul bujana-kulit, akulit tembaga, awalung wesi, aotot kawat, luputa ring lara-roga, luputa ring jaramarana, wastu den kadi pangraksanira sira Sanghyang Aditya, mangkana pangraksanira sing SI Jabang-Bayi, raksanen ring esuk lawan srahina-wengi. Om, Na ma si wa ya. “

4.      Sodaan, Punjung miwah Penek, Mantra :

“Kaki Siwagotra, Nini Siwagotra, sira angadeg sanakira kabeh salwiranya; Anta, Prete, Buta, Kala, Dengen, Anggapati, Mraapati, Banaspati, Banaspatiraja, muah Babu Lembana, Bau Abra, Babu Sugian, Babu Kakere, wetu sira kabeh, abersih apemungan lawan sanakira denta rahayu becik. Om, Sidrir astu ya nama swaha.”

5.      Banten Kumara-Kumari. Indik pangayabane marep menek, doaning genah bantene puniki, kagenahang ring palangkirane sane wenten “ring duur” baleen.  Mantra/saa: “pukulun sira Sang Indung Bajang samodaya, makadi Nini Among, Kaki Among, iki tadah sajinira, tumpeng putih-kuning maulam ayam putih syugan, den tulus sira anitihaken janma manusa, den aweha seger-oger warasa, pada denira andulu rare ayu Om, Sidir astu, astu, astu.”

6.      Banten Guru-piduka, mantra/saa:

“AUM, Hyang Pradana, Hyang Purusa, Hyang Siwa Guru, Hyang Surya-Candra” manusanira maguru-piduka, angaturaken pamahayu, wud atanggapana, de Sedahanira Bagawan Panyarikan, enak nira Bagawan Citra-Gotra, Citra-Gotri, manusanira anembaha tangan karo, aneda sinampura, manawi wenten sabda saud, sacampur, linyok, lepas pangucap, sampun ta angadakaken ta ya sukerta, manusanira aneda tirta darma-amerta, Hyang Iswara, Hyang Sambu, Hyang Sarwa Dewata, manusanira ma-guru-piduka, Om, Sidir astu, la nama swaha.”

7.      Banten Sambutan atawa Sesayut,

Mantra / saa: “Pukulun Kaki Prajapati, Nini Prajapatim Kaki Samantara, Nini Samantara, Kaki Citragitra, Nini Citragotra, ingsun aneda anugrahania. Neda anyambuti Si Jabang Bayi, manawi atmanipun, angajaha maring pinggiring samudra, ring telenging udadi, ndaweg sambutakna maring raga kawalunane Si Jabang Bayi, den pun jetel saha ayu ujar. Om, sidir astu ya nama swaha.”

8.      Puput punika, sane mangkin kalanturang antuk Malelabaan Punika nasi-tulunge, nasi prase miwah tumpeng prase, ambil kidik-kidik, ajengin rarene, inda-indayang kewanten. Dulurin antuk Mantra/saa:

“Om, Pancawara bawet Brahma, Wisnu Saptawarewaca, Sadwareswara dewas ca, Astaware Siwo jnyeyah, Om kara muktya sarwa pras pranayanam.”

N.    Usan tanab ring baleen, mangkin ajin rarene atawa gurun rarene, biangne kalih rarene sane katigang-sasihin, ka pamrajan atawa ka sanggah kamulan, gumana pacing ngaturang “Wastan” rarene, majeng ring Ida Batara Gede Kamulan miwah para Leluhure, pingarep Ida Sanghyang Widiwasa.

Rauh ring sanggar pamujan, sang muput karya raris ngunggahang banten piuning ring pasimpangane. Ajin atawa gurun-rarene biangne kalih rarene, malinggih narepin pasimpangane punika.

Pakeling : Ring ajeng genahe malinggih (ring natahe), becik karyanang gegambaran sane mareka Badawangnala sane kalilit antuk I Naga-Gombang. Puniki pinaka lambing “ Sanghyang Wisnu miwah Sanghyang Ibu Pertiwi. Ring gegambarane punika batis rarene enceg-encegang ping tiga. Yan rare lanang patut sang lanang sane ngemban rarene. Yan istri anak istri sane ngemban. Tatujone puniki, gumana ngaturang uninga ring Ida Batara Wisnu miwah Sanghyang Ibu Pertiwi, sumangdennya terus rarene ka-emban serahina-wengi, miwah kaicn pangupajiwa sepanjang yusa.

1.      Ngaturang uninga. Aturang wastan rarene, Mantra/saa:

“Inggih Ratu Batara Gede Kamulan, miwah para Dewa-Dewi sane malinggih ring pamrajan iriki, pingarep Ida Sanghyang Widi, puniki okan dane (putran ida) sane kakaryanang upakara tigang-sasih puniki, mawasta :

……………………………………………………………………………..

(iriki ucapang wastan rarene).

Cendek titian sareng sami, nunas mangda ledang Palungguh Batara ngicen krahayuan sapanjang yusa.”

2.      Nedunang rare. Mantra /saa:

“Pukulun Kaki Cipta-Gopta, Nini Cipta-Gopta, ingsun amwit anurunaken rare, ameng-ameng ring lemah, turun ayam, ameng-amengana sarwa ratna-kencana sri-sedana. Ameta urip-warasa. Keduk timbul, bujana kulit akulit tambaga, awalung wesi, aotot kawat, muliha ring raga kawalunane Si Jabang-Bayi. Om, sidir astu tat astu astu.”

“Om, tebel Buli, Tebel Akasa, Tebel Jiwitan ………………..(ucapang wastan rarene)………..iki. Om, sidir astu tat astu astu.”

3.      Puput pailene puniki, raris rarene, ajine (gurune) miwah biangne, sirat-siratin tirta skaing Kamulan, Kamimitan, Kahyangan, tirta Pabersihan, Pangening-ening,miwah sane lian-lianan. Siratin ping tiga, nicip ping tiga, tumuli masesarik antuk beras – wijane.

  Untuk lebih jelasnya sahabat bisa mengoleksi buku ini yang sudah beredar di toko buku:

Dari buku Pemargin Upacara Nigang Sasihin olih Ketut Ginarsa, Singaraja 1974